Pocari's Life: 雙牛睡魔阻前路, 敗走梅子林

話說星期五晚都未諗到星期日去邊度, 本來有友人約我"又"遊走東壩西灣亭, 不過因為不久前已去過, 所以也推掉左. 點知真係又勾起行山癮, 結果就問另一友人跟團由沙田行至西貢, 朋友當晚也急忙要到行山店買雙行山鞋.

但係我實在太唔聽話, 明知第2日行山, 結果都係2:00am先訓得著, 5:30am就彈左起身再訓唔返. 係嚴重缺眠的情況之下行山真係好大鑊, 不過都試試啦, 反正都差不多有幾個星期冇行啦. 結果一出石門站之後先發覺唔記得買水!!!!! 真的好大鑊啦~~~~我平時都係至少要飲兩支水, 但係我係屋企只係入左一支500ml, 死得人啦~~點算呀!! 唔理啦, 行左先啦~~~~

[路線簡介]

由石門迴旋處上走石門脊亞公角山, 沙田城門河, 火炭及吐露港一帶景色, 盡現眼底. 沿女婆凹, 牛凹上走石芽山初段山徑比較陡峭崎嶇. 頂峰石林為旅行界所稱之雙牛石城. 下望白沙灣一帶, 帆影處處, 麥徑長城段如腰帶般于山腰間曲折蜿蜒, 蒼林密佈, 一片青蔥. 打瀉油坳往下走企壁山, 三塊田至彿光寺白沙臺終點, 路途較為平順.

出發點係沙田石門站, 出發前當然要影一張留念呢~

9:15am, 出發!

我想應該也有50多人浩浩蕩蕩的行山囉.

經過石門迴旋處, 亞公角山路路邊有條"行山徑"上去. 唔講都唔知呢個係入口.

經過呢一段小徑之後, 又見到呢班"異能人仕"塞車啦, 點解咁講呢, 因為佢地天生一副摩打腳, 如果連佢地都話要塞車, 咁前面既路就真係有D 擔心.

哦~~原來又係排隊要攀上去. 不過今次一起跳就已經係攀叢林大石.

唔好以為係平路, 又係50度攀左上黎, 之後仲要拿拿聲影完相就走, 唔好阻塞"交通"丫嘛.

終於都攀左上黎小歇點, 可能還不算很高, 所以只係影到石門住宅區~

好啦, 呢張再高少少既, 可以睇得晒成個迴旋處囉.

之後又再經過D樹林石陣.

其實沿路都好多泥沙, 因為天氣太乾令到行起上黎都好滑, 幸好都有唔少立足點. 不過前面呢舊大石又點可以立足呢, 所以咪又係要攀呀攀, 咁一步踩過去啦~

好了, 更高一點的景觀更開揚, 整個沙田圍及馬場也可以看到了,

之後繼續不斷向上攀, 今次用上雙手的機會大得多了, 因為實在有太多大石又或者整個石頭太斜呢.

唔好以為呢張相唔知影D咩, 其實要很仔細的才看到右邊的大石旁有兩個"人仔"呀~

那兩個人仔在大石上做咩呀?!? 等我一陣都要企係果度影相先 (D相還在朋友相機中.....)

搵呢張頂住先 (其實企果時唔覺危險, 但係而家睇返又真係好似幾危喎, 話晒都係小石頭咋嘛~)

真的"好高鶩遠"囉!!

之後開始發覺唔係好對路, 點解越行就越熱既呢?? 之後就密密咁飲水, 今日天氣對行山黎講都算係小熱啦, 而且原來一路上都係冇咩樹遮蔭, 開始做緊粒乾蒸牛肉啦.

我地就係要跟住條隊咁"又越過高山又越過谷"~

走過亞公角山之後又落返個山谷, 再上去女婆山.

女婆山就在不遠處

遠眺馬鞍山, 天色真係好靚丫~

穿越途中見到呢座筆直既山峰, 原來呢坐係牙芽山, 遠處只係見到有如螞蟻細小既團友已經係度攀上去 >.<

好啦, 又到女婆山下的一個景點....小頭初露....你估佢似咩丫???

哇!! 不文石呀!!! 好大支呀!!!!! 見到我都"嘩"左一聲, 有冇咁大支呀??? 女婆山真係好識得"享受"呀!

點推都推唔郁, 我真係好羨慕囉!!

影過相之後就要拿拿聲落返去啦, 唔係又再次比人拋離啦~

又再深入叢林之中. 前面呢個女士真的很厲害, 一陣再講.

好啦, 去到女婆凹[坳] (凹[坳]即指山與山之間的位置), 有三分岔路. 由於友人隔左幾年冇行山, 所以體力上未能支持繼續. 而我又一心想著要繼續走, 所以本來都打算走上牙芽山. 行左10分鐘後, 可能真係缺眠又食水唔充足, 再加上原來到女婆凹只係整段路程既1/4, 而且已經用上左3個鐘, 雖然應該係上山初段較跨越山峰更花時間, 最後都係放棄左走回頭路經女婆凹走去梅子林啦~~

對, 頭先提到果位女土本來係打算同我一齊上牙芽山, 不過我臨時閃左, 佢就繼續跟大隊走, 點解佢咁勇呢? 原來佢之後整個月都冇得再行啦, 係因為佢下個月要上珠峰囉!! 係珠穆朗瑪峰, 雖則唔係去到山頂, 但係去到camp base點都要6500m. 不過事後都有幸可以同到去珠峰既人一齊行山.

好啦, 因為來回的20分鐘, 我又急急的走去梅子林村, 但係後來先發覺友人係行左另一邊, 即黃泥頭方向. 最後當然係遇唔到啦. 走到梅子林村之後基本上已經係行完, 只係沿著馬路一直走到富安花園. 沿路都有好多一家大小行呢個郊遊徑.